La Voz de Galicia
7/6/2012
Compostela
A convocatoria da empresa pública Servizos Agrarios Galegos
(SEAGA) para a selección e contratación do persoal que formará as brigadas de
loita contra os incendios forestais é un 70 % inferior á do ano pasado. Se no
2011 houbo 1.800 prazas, este ano tan só se fixeron públicas 500. Delas, 250
corresponden a peóns, 125 a xefes de brigada, e outras 125 a peóns
especialistas.
No exercicio anterior, tan só o número de peóns contratados
por Seaga para as brigadas da Xunta foi de 990, o que fixo temer entre os
sindicatos que os medios cos que vai contar Galicia este verán para previr e
extinguir incendios forestais váianse reducir drasticamente. A CIG alerta de
que xa o ano pasado o recorte foi significativo, ao deixar en 1.800 o número de
empregados de Seaga cando no 2010 esta cifra foi de 2.300.
A Consellería do Medio Rural e Mar négao rotundamente. O
departamento que dirixe Rosa Quintana explicou onte que a oferta de prazas
feita pública por Seaga o día 1 deste mes é só unha primeira convocatoria, e
que haberá máis. Isto sería a primeira vez que sucedese, xa que nos anos
anteriores tan só houbo unha convocatoria de prazas para brigadistas de Seaga.
Pladiga
En todo caso, Medio Rural considera que o verdadeiramente
significativo serán os medios que se recollan no Plan de Prevención e Defensa
contra os Incendios Forestais de Galicia (Pladiga), que se aprobará este mesmo
mes. A Xunta asegura que cando este documento se presente quedará patente que
os medios antiincendios con que contará Galicia este ano serán iguais aos que
tivo no 2011 e que os axustes pola crise económica non afectarán ao operativo.
O secretario nacional de CIG-Servizos, Paulo Rubido, non só o
dubida, senón que asegura que dun operativo total composto por 4.500 persoas
antes da crise, este ano a Xunta só contará con 1.600. O sindicato nacionalista
cre ademais que Seaga non convocou máis prazas polo problema co que se atopou
ao estimar o Tribunal Supremo as reclamacións polas contratacións de anos
anteriores «que estaban en fraude de lei e que por iso hai 228 persoas que
gañaron a praza, porque a Xunta non optou por indemnizarlles. Agora non quitan
máis prazas para evitar que se repita esta situación e que se amplíe o cadro de
persoal neste servizo», afirma Rubido.
Detención
Por outra banda, a Policía Autonómica detivo ao presunto
autor dun incendio forestal o pasado 31 de maio en Trazo (A Coruña) no que se
queimaron 700 metros cadrados de monte arboledo. O lume tivo a súa orixe nunha
queima sen medidas de seguridade. Este ano xa son 85 os arrestados por esta
causa.
